Ripote e Palimedi

O rau na lewe ni Palimedi mai na i To ni Veisaqa o Ro KIniviliame Kiliraki kei Niko Nawaikula e Palimedi e na siga Moniti. Veitaba: ATU RASEA

ESA soli kivua na Vunivola ni Palimedi ena siga Moniti na nodratou vola tukutuku na komiti digitaki ka dikeva na lawa kei na dodonu ni tamata yadua ena vuku ni lawa vakaturi na Information Bill.

A vakaraitaka e Palimedi o Ashneel Sudhakar ni lawa vakaturi oqo e kena i naki me na solia vei ira na lewenivanua e Viti na dodonu ena kena tarogi ki na tabana ni matanitu na nodra vakatulewa ena vuku ni so na vakatulewa e dau yaco.

Oqo me vaka na noda dau biuta na noda vakatutu ena so na vakacicivaki bisinisi, ka qai sega ni taurivaki na veika ko biuta yani oya, ia na lawa vakaturi oqo e na rawa kina vei iko mo na taroga se cava na vuna e sega ni taurivaki kina na nomu vakatutu.

Tukuna talega o Sudhakar ni levu na vakatutu eraou ciqoma ena vuku ni kena biu vata na lawa vakaturi oqo.

Ka ratou ciqoma talega e levu na i tukutuku ka vukei eratou ena kena biu vata na nodratou ripote ena vuku ni lawa vakaturi oqo.

E vakavinavinakataka ni tiko talega na gauna me ratou laki veitalanoa kina kei ira na kena dau era biuta vata na lawa vakaturi oqo.

E vakaraitaka talega o Sudhakar ni so talega na veika e tiko ena Yavu ni Vakavulewa ni 2013 e kovuta na lawa vakaturi oqo me vaka na nona dodonu e dua na lewenivanua me na kauta mai e dua na i tukutuku e tiko vua na matanitu.

E vica vata na ripote e sa mai vagolei ki na Bose Lawa ni oti na nodra raica vakavinaka ka vakatututaka na lewe ni komiti digitaki e Palimedi ena vuku ni kena buli tiko na lawa me baleta na noda tiko vinaka na lewenivanua e Viti.

More Stories