Nakarawa

ENA gauna qo e sa vinakati tiko o Leone Nakarawa me lewena na timi rakavi lewe ya vitu ni Viti na Fiji Airways Fiji 7s ki na sotasota ni ni Qito ni Vuravura ena vakayacori tiko mai Amerika.

Ia, esa kacivaka tale tikoga ko John McKee na dauniveivakatavulici ni timi ni rakavi tinikalima ni Viti ni vinakata me na mai qito o Nakarawa ena Flying Fijians ena sotasota ni Pacific Nations ena sota kei Samoa, Toga kei na timi ni Georgia.

A vakaraitaka o Gareth Baber na dauniveivakatavulici ni timi ni rakavi lewe ya vitu ni Viti ni gadrevi Nakarawa vakalevu ena vuku ni vakarau ni qito e kilai tani kina ena buturara ni rakavi lewe ya vitu.

Ia, e mani kacivaki tale tikoga na yacai Josua Tuisova kei Semi Radradra mai vei John McKee kei Gareth Baber ena vuku ni nodratou qito vinaka tiko mai valagi ka gadrevi tiko na nodratou rawa ni mai lewena na timi ni rakavi tinikalima kei na rakavi lewe ya vitu ena qito ni vuravura.

Ia, esa tuvana talega e dua na tuvatuva me na veivuke ena nodratou na rawa ni qito ena timi ruarua ni Viti o Tuisova, Nakarawa kei Radradra.

E rau a lewena na timi ni Viti ena kena rawati na koula mai Rio ena sotasota ni Olympics o Tuisova kei Nakarawa ena nodrau mai tuberi vei Ben Ryan na dauniveivakatavulici e liu ni timi ni Viti ena loma ni dua na vula vakacaca ni oti mai na nodrau qito rakavi tinikalima voli mai Iurope.

E sa mai taukena nai covi ni dauqito ni yabaki 2018 e Iurope (European Player of the Year 2018) ko Leone Nakarawa na tuwawa ni Flying Fijians ka qito tiko ena timi ni Racing 92 ena gauna qo mai Varanise.

A veivuke sara vakalevu o Nakarawa ena timi ni Racing 92 me yacova na fainala ka ratou mai druka kina ena kai veivolekati vei Leinster.

Na nona mai digitaki qo o Nakarawa e vu mai na nodra digidigi na lewenivanua kei na nodratou vakatulewa na daunididigo ka kenadau ni rakavi mai Iurope.

E dua nai sausau vou e mai rawati ena vuku ni digidigi e mai vakayacori ka sivia ni 21,000, ni bera ni qai biu yani na yacadra na dauqito digitaki ni cava na Janueri. Na nona mai qaqa oqo e i sevu ni dauqito e vakaitavi tiko ena sotasota ni Top 14 me tekivu mai na 2015.

A mai ciqoma o Nakarawa na veiqaravi ni kabani ni waqavuka na Turkey me vukaca e rauta ni 1 na milioni na maile kei na dua na nona metali.

A mai karua talega ni dauqito me ciqoma nai covi ka vakatokai tiko na ‘Anthony Foley Memorial Trophy’.

A qaqa ena fainala na timi ni Leinster vei Racing 92 ena 15 kei 12 me nona kina na Champions Cup.

More Stories