Kua ni ko vakatagici au

NA nodratou sere, Kua ni ko vakatagici au, e dua na sere taleitaki ena veiyasai Viti, mai valagi kei na veivanua ni veivakamarautaki.

Eratou sa sureti wavoki tiko ena veiyasai Viti ena gauna qo na matasere domo kamica qo ni Wainimala na Seniboro Junior Group ka ratou veivakamarautaki tiko ena veisoqo vaka-Viti, vakabibi ena nodratou dau lagata vakalevu kina na sere ka dau tara vakalevu na yalodra na lewei Viti ka a bulia ga na nodratou daunibuli sere ko Eminoni Qarailawaki.

E ratou a laurai na lewe ono na daulagasere qo ena i tikotiko ni Lotu Katolika e Vanuakula, Naitasiri ena gauna e yaco kina e kea na timi mai na Nai Lalakai.

Ea solia ga na nona matadredre na turaga yabaki 48 daubuli sere qo ena gauna e a vakatarogi kina me baleta na sere ka dau vesuka na nodra mona na dauvakarogoca voli ena retio.

“Oya na kena sere na vugoqu. A se qai vakamau ga kei na watina e tagane ni Bucalevu, Ra, e dua na luvedrau, se qai vula lima na luvedrau, sa mani tukuna o tagane vei koya me lako mada i dua na vanua. Na nona lako ya, e sega tale ni qai lesu mai.

A qai mani rogoca na vugoqu ni sa la’ki tiko tale o watina kei na dua tale na yalewa.

A gole mai vei au na vugoqu ena mosi ni yalona ka kerea me’u bulia na kena sere me baleta na nona biubiu na nodratou ta ka sega madaga ni bau vakaraitaka ni sa gole tiko vakadua.

“Na itekivu ni sere e vakatoka qo, Ko sega ni tukuna ni ko sa mai gole vakadua, me rawa ni’u tukuna vei iko na watiqu me kua, e seretaka na nona i talanoa,” e kaya o Qarailawaki.

Kua ni vakatagici au, e vakaibalebaletaki tiko ena mosi kei na tagi e tarai koya na marama ni Naibita qo ena nona biubiu na turaga watina na turaga ni Bucalevu.

E seralaka ka talimagimagitaki na sere qo na taledi e tiko vei Qarailawaki me bulia nai talanoa me dua na sere.

O Qarailawaki e cavutu mai na koro vakaturaga o Sawanikula, Wainimala ena loma ni yasana o Naitasiri, ka a se tekivu laga sere ga mai ni oti na nona biubiu mai koronivuli ni cava na nona vuli.

“Au dau lagasere ena veiotela, valenidanisi, soqo vaka-Viti. Ka tekivuna talega na noqu dau buli sere ka tiki ga ni noqu dau qarava na noqu veiyaqona.

Au qai raica ni dodonu me’u na kauwaitaka sara vakalevu ka sa vakavuna na noqu vakadeitaki au me’u na dau buli sere.

Au a bulia talega na sere ka lagata na Drodrolagi kei Delainava mai na noqu koro kei na Miramira ni Seniboro.

“Au a lagasere talega ena Voqa vou ni Medrausucu ka mani mai yaco e dua na duidui ena matasere qo.

Au a mani tukuna vei ratou na noqu gone me’u sa na bulia ga na neitou sere. Keitou a biuta vata na Seniboro Junior Group ena 2017 ka sega tale ni qai vakasuka i muri ena neitou sa dolava na i matai ni neitou katokatoni.

Na matasere e lewena na luvena kei iratou na luvei tuakana. E tukuna o Qarailawaki ni matasere qo- na Seniboro e vakayacani kina nodratou yavusa, na yavusa Naboro. Ka yaca talega ni nodratou kau ni vanua.

“Na rogo vinaka ni neitou sere esa dolava an katuba vei keitou,” e kaya o Lewaboro (Qarailawaki).

“Na kabani ka rogoca na neitou katokatoni e sega ni lavaka e dua nai sau ena ikarua ni neitou katokatoni ka keitou marautaka sara vakalevu.

“Na sere-Kua ni vakatagici au esa maketetaki keitou saraga e Viti taucoko ka vaka kina ki valagi,” e kaya ena matadredredre.

E na tavoci tiko na nodratou katokatoni ena i ka va ni Me.

More Stories