Veitalatala vei Bari

KO kovula Manasa Bari esa dauniveivakatavulici voli mai ni timi ni Ovisa ni noda vanua ena rakavi lewe ya vitu mai na 2006, ena ruku ni nona veiliutaki e yaco kina me dua vei ira na dauniveivakatavulici rogo ena vuku ni nona rawa ka ena levu na sotasota ni rakavi lewe ya vitu ena noda vanua.

Na turaga dauvosa malua qo ni Tavualevu, Tavua a mai talaci ena Lotulevu sa oti mai vei ira na vakalesilesi liu kei ira na lewena na timi ni rakavi lewe ya vitu ni Ovisa ena nona sa na biuta tiko na noda matasawa me na la’ki tomani ratou na nona vuvale mai Townsville e Ositerelia.

O kovula Bari e dau kilai levu ena yaca na ‘Black Pearl’ ena nona gauna ni qito rakavi, ka kilai levu ena nona a lewena na timi n Viti ka qaqa ena Qito ni rakavi lewe ya vitu ni vuravura (Rugby World Cup 7s) ena 1997 ka basika talega me dua vei ira na i sevu ni cauravou ni Viti me lewena na timi ni Otago Highlanders ena sotasota ni Super Rugby.

Ena gauna e veiliutaki voli kina ena matatimi ni Ovisa ni Viti ena rakavi lewe ya vitu a vakaitavi sara vakalevu o koya ena kena toso vinaka na timi ni Ovisa ka ratou qaqa kina kei na rua na nodratou la’ki vakaitavi ena qito ki Samoa kei Ositerelia.

Na nodratou qito vinaka na timi ni rakavi lewe ya vitu ni Ovisa e vakavuna sara kina na nodratou la’ki lewena na timi ni Viti eso na cauravou dauqito ni timi ni Ovisa me vakataki Sailosi Rabo, Manu Lagai, Sakenasa Aca, Livai Ikanikoda, Jo Ravouvou ka sa qito tiko qo ena timi ni All Blacks, Samisoni Viriviri, Joeli Lutumailagi ka vaka kina ko Paul Keponi kei Eroni Sau ka dau vakatokai tiko na ‘sledgehammer’.

Na taucoko kei na veika vinaka e ratou rawata na matatimi ni Ovisa ena qaravi tavi esa laurai sara na vuana ena kena vakayagataki na porokaramu ka vakatokai tiko na “Policing Fiji through Rugby” ena nodra vakaitavitaki na Ovisa me ra veivuke ena veitikotiko ena nodra tarai nai tabagone me ra vakayaloqaqataki me rawa ni ra kakua ni basu lawa.

Ena nona talaci o kovula Bari ka vakaitavi tiko kina o ACP Luke Navela ena nona gusudra tiko nai liuliu ni Ovisa ni noda vanua, e kaya ni na dredre dina na kena vakaisosomitaki tale na itutu esa mai biuta koto o Bari.

E kaya o Navela ni bilo kece esa rawati ka laurai tiko ena vatavata ni i covi ni qito rakavi lewe ya vitu ni Ovisa e vakaraitaka na veiliutaki nei Bari ka vakavuna talega na kena kilai na timi ni rakavi lewe ya vitu ni Ovisa ena buturara ni rakavi ena noda vanua ka vaka kina eso vei ira na ovisa era sa la’ki vakacecebuiyataka na kuila ni Ovisa ena buturara ni veiqaravi ni noda o Viti ki valagi.

E gusudra tiko na Ovisa o Navela me solia na nona vakanuinui vinaka kina vuvale nei Bari ka kaya ni nuitaka ni la’ki tekivutaki tale e dua na drauniveva vou ni bula mai Ositerelia ka na biuta tale tu ga mai e dua nai vakarau kei na i vakananumi tudei ena loma ni Tabacakacaka ni veiqaravi vakaovisa.

E a qai tukuna o Bari ni marautaka sara vakalevu ka doka na nona mai lewena na Ovisa ni noda vanua ka na sega ni rawa me na dolea lesu na veika e mai vukei koya kina na Tabacakacaka vakaovisa.

E kaya, e na nona mai curu me lewena na Ovisa ni noda vanua e vukei koya me rawata na bula vinaka ena nona vuvale, kei na nodratou rawa ni la’ki vuli vinaka na luvena ena vuku ga ni nona a mai curu ena Ovisa kei na nona rawa ni mai tomana na nona taleitaka na rakavi me mai dauniveivakatavulici ni matatimi qaqa ni rakavi lewe ya vitu ni Ovisa.