Sasaga cake o Bituniyata

E SASAGA tiko o Setareki Bituniyata na dauqito e liu ni timi ni Fiji Airways Fiji 7s ka sa qito tiko ena timi ni Massy ena sotasota ni PRO D2 me na la’ki qito ena sotasota ni Top 14 mai Varanise.

A konitarakitaki tiko ena yabaki sa oti na cauravou yabaki 23 qo ka a mai gade voli ena noda vanua ni oti e dua na nona mai vakacagicagi voli.

E tukuna o Bituniyata ni sa vakanamata tiko me na qito ena dua na timi ena veta e cake mai Varanise ena tekivu ni sotasota tarava qo.

E kaya ni levu na timi vinaka era vakaitavi tiko ena sotasota ni Top 14 mai Varanise, ia esa nakinaki tiko me na lewena na timi ni Toulon se na timi ni Racing 92 ka sa nakita tiko me na qito vakavinaka me rawa ni dua na nona konitaraki vinaka talega.

E namaki tale tikoga ni ra na veitomani tale eso na noda cauravou ki Varanise.