Nadro kei Naitasiri

E RAU na sota tiko ena macawa qo na timi ni Naitasiri kei Nadroga ena dua tale na wavoki ni sotasota ni Skipper Cup ena Vakarauwai qo.

Oya ni oti na nona qaqa na timi ni Naitasiri vei Nadi ena 21 kei 13 ena Ratu Cakobau Park e Nausori ena i ka tolu ni wavoki ni sotasota ni Skipper Cup.

E na dua na qito kaukauwa e rau na vakayacora na timi e rua ka ni a qaqa talega mai na timi ni Nadroga vei Navosa ena 62 kei saiva ena Lawaqa Park e Sigatoka.

A tekivu vinaka o Nadi ena i tekivu ni sota kei Naitasiri ka mani solia kina o daunivakatagisici nai totogi vei Naitasiri, caqeta curu o Nadi ena i ka 19 ni miniti.

Ia, e ratou ravu lesu na cauravou ni Naitasiri ena nodratou a basuka nai lati ni tataqomaki nei Nadi ka tabaka kina e dua na sikoa o Filimoni Seru ena i ka 40 ni miniti ka caqeta curu talega o koya na kena i caqe me liu kina e na 7 ka 3 tiko o Nadi ni mai cava na i matai ni veimama.

Ena ikarua ni veimama e ratou sa vakatulewataka sara tu ga na qito na timi ni Naitasiri ena nona tabaka e dua na sikoa ko Lepani Raiyala na wigi me liu sara kina ena 14 kei 3.

A mani tabaka tale edua na sikoa o Naitasiri mai vei Josaia Navualiku ena i ka 61 ni miniti ka caqeta curu na kena i caqe o Kini Douglas me liu sara kina ena 21 ka 3 tikoga o Nadi.

Ia, ena i ka 69 ni miniti a tabaka o Samuela Saqiwa e dua na sikoa me 8 kina na kai kei Nadi. Ka tabaka talega ena i ka 77 ni miniti o Jope Tavucuilagi na wigi ni Nadi me 13 kina ka 21 o Naitasiri.

A qito vinaka sara tiko ena timi ni Nadi o Jiuta Takubu, a sega ni qito ena timi ni Nadi ena nodratou druka vei Navosa ena macawa rua sa oti ena vuku ni nona osooso vakacakacaka.

E vakaraitaka o Koli Sewabu na dauniveivakatavulici ni timi ni Naitasiri ni ratou na vakaukauwataka na nodratou vakarau ni qito ena loma ni 80 na miniti ka dei tikoga ena i tuvatuva ni qito e ratou na qito tiko kina.

Ia, e vakaraitaka o Savenaca Aria na dauniveivakatavulici ni timi ni Nadi ni ratou mai druka ena dua na timi kaukauwa.