Ena rawa ni Viti vinaka

KE dua na Viti vinaka eda na gadreva, ia au nanuma ni dodonu me na vakalesui ga mai na veivakanakuitataki vei ira na gone ni ra cala.

Oya na veika e vakaraitaka ko Peni Delaibatiki na vunivola levu ni soqosoqo ni qasenivuli iTaukei (Fijian Teachers Association) ena vuku ni nodratou kauwai tiko ena levu ni nodra dau talaidredre tiko na gonevuli mai koronivuli.

“Na nodra kuita na gone me yavutaki ga mai ena nodra lomani ka me ra vakadodonutaki ni cala, ka sega ni kuita ni cudru,” e kaya o Delaibatiki.

“E levu vei keda nikua eda lako curuma mai na veikanakuitataki, eda sa mai tauca tu kina qo na vuana ena veivanua eda sa veiqaravi tiko kina nikua.

E kaya ni gauna qo sa dredre na veikanakuitataki ni sa vesuki ira na qasenivuli na lawa baleta ni sa tabu na nodra kuita na gone.

“Keitou sa vunautaka vei ira na qasenivuli ena gauna qo ni sa sega na veikuitataki, ka kuita levu duadua ga na nodra vosa tiko vei ira na gonevuli na veika e dodonu me ra cakava.”

E vakaraitaka talega ko Peniasi Yalawai na turaganikoro ena koro vakaturaga o Nairukuruku na nodra itikotiko na Turaga iTaukei ni Waluvu ena yasana o Naitasiri, ni raica saraga o koya na duidui levu ena kena sa mai vakatabui na nodra vakavulici na luveda ena kuita.

“E levu saraga na duidui au sotava ena noqu turaganikoro qo ni’u vakatauvatanitaka na gauna ni’u se gone kina, oya ni keimami se kuita ni dua e cala.

“Na gauna qo sa rawa ga ni vakatikitiki na qase ke rau sota kei na dua na gone ena sala simede e loma ni koro,” e kaya o Yalawai.

E kuria na turaganikoro yabaki 35 qo ni raica o koya na duidui levu ena nodra sa dau vakabebe (talaidredre) na gone. E kaya ni sa bau veivuke toka na Bose Vakoro ena kena sa lewai mai kina me dau nona itavi me vosa vakadodonu vei ira na gone ka la’ki vakaraitaka talega vei ira na nodrai tubutubu ke dua na gone e talaidredre se vakarau ca e loma ni koro.

Ia, e vakaraitaka ko Pastor Joe Talemaitoga na i vukevuke ni Qase Levu ni Lotu i Kavitu, ni nodra vakavulici na luveda e tiki tiko ni nodra vakatavulici oya me ra kanakuita.

“Ena loma ni veivakavulici kei na nona tuberi e dua na gone e dodonu me na kuitataki ke cala ni tukuna tu vakamatata nai Vola Tabu.

“Ena gauna mada iliu e vakayacori na veikanakuitataki ka ra sa rawati ira tu kina e levu na lewenivanua ena gauna qo.

Ia, na kena sega tiko ni vakayacori na veivakavuli ena kuita, e laurai ni sa qai tubu ga kina vakalevu na leqa se na basu lawa.”

E kuria o Talemaitoga ni tukuna na i Vola Tabu me ra kuita na gone ka tiki tikoga ni nodra vakavulici ena bula vakaivakarau.

E kaya ni veitiki ni Vola Tabu era tukuna na kuitalaki ni gone e tiko ena Vosa Vakaibalebale 13: 24- O koya sa sega ni vakanakuitataka na luvena sa cati koya: Ia ko koya sa lomani koya sa vakanakutataka ni sa gone. Vakaibalebale 23:13-Mo kakua ni tarova na kuita mai vua na gone; Ia ni ko sa warolaki koya, ena sega ni mate kina.
14. Mo warolaki koya, Ia ko na vakabula kina na yalona mai eli.